Oté

La pa bézoin ankor pèrd lo tan !

Justin / 11 févrié 2010

Souvan-défoi, mi rogard la kart loséan indyin. Sa lé gran sa Baya ! Dann bor, nana in bon pé péi : bann gran-gran, bann moiyin, bann pti, bann ti guiguine galman... déssèrtin lé pa dann bor, mé dann milyé dolo. Shak foi, mi sa rode La Rényon. Mé pou trouvé, i fo pou komansé fé port lo zyé déssi Madagascar. Apréla solman i gingn débisk nout péi... in pti mizïng poin dann loséan. A oui ! i pé di, nou lé pti pou vréman.
Nou lé pti, lé vré ! Mé la pa pou sa nou na poin nout gou-d’sèl. La pa pou sa nou la poin nout droi viv, nout droi an avoir in plass an parmi toulmoun... zistoman, la plipar d’tan, moin l’apré kalkilé kèl plass ni pé an avoir. Ni pé pa kontant in bann gran i zok anou avèk lo doi épi i di, pou arpran in vyé patoi : « Déboul dann mon kol pinèz ! ». Ni pé pa non pli baz solman déssi La Frans pars sète-la lé byin koni. Zot i konpran, ni pé pa solman égzis par prokirasyon. Ni vé égzist par nou-mèm !
Alors kan lo prézidan Sarkozy i di i fo in dévlopman "andojène"... ni di bravo, mèm si mi profèr di "otosantré" ! Kan li di i fo fé la kopérasyon avèk lé z’ot péi par nou mèm... ni bate la min ! Arzoute èk sa, li di la pa bon d’ote ké nou i sign bann trété k’i konsèrn anou... ou i parl konm nou lé kontan. Pars nana si tèlman lontan ni domann z’afèr konmsa... tèlman lontan ni domann pou égzisté. Mé konm di lo kont, dolo la fine koulé sou lo pon... alors la pa bézoin ankor pèrde lo tan.

 Justin 


Kanalreunion.com