La solidarité, lo réspé la parol doné :
In l’éritaz i vo bokou plis in pla lantiy !

Matant Zélida la ékrir Justin :
Mon shèr nové, mon spès salté,
Mi domann amoin bien akoz zot, bann rouj-de-fon, zot lé vyé-zé konmsa. Alor, ala k’zot i anparl lo réspé bann valèr, l’obligasyon ténir in promès ou la fé. In promès ? Na arienk sak i kroi lé angajé, sak la fé, li lé pa la èk sa. Arzout èk sa la solidarité vizavi in pèrsone soi-dizan viktime in l’inzistis. Mon z’anfan, la politik i marsh pa koman sa ! La-dan, pli vif pli trèt ! Sak li la gagné tan myé, si li la pèrd, moushoir i mank pa dann gran sirfas. Lé vré pou tout parti, é mésyé Didier i amontr anou lo l’égzanp : zot va oir si lo Paulet Payet i sava pa dingué ! Zot va oir si d’ot ankor i rès ar pa zot lo zyé pou pléré. Tok ! Pran sa pou toi !

Justin la fé pou répons :
Mon vyé matant k’i koz arienk la boush rouvèr,
La ou la koup amoin la ! Alor estèr, ou osi, ou i anvoy la moral dingué ! Lé pa posib in n’afèr konmsa ! Mi rogrèt dir aou, dan mon parti i koz pa konmsa. In promès ? Sa lé sakré, é shak foi i gingn tyinbo, i fo tyinbo. Lé vré, ou lé pa touzour gagnan, mé ou i pé rogard aou dan la glas san rouzi, é sa sé in n’afèr inportan.
Pou la solidarité, sa in n’afèr lé bien nésésèr. In l’égzanp ?, èd la famiy in kamarad pouvoir kolonyal la mèt ali la joi, sa l’arivé dann pasé, é konbien foi kamarad té solidèr. La solidarité ankor ? Mi pans, pèrsone la pa obli la klandéstinité Paul Vergès épi sèt Pierre. Pa solman pars zot sé bann dirijan. La solidarité té i marsh galman kan bann dalon pti kolon té dann danzé.
Alor zordi, pou in plas mèr, i ansèrv payason avèk bann prinsip. Sa sé in n’afèr i fo pa. Sa sé nout l’éritaz, é kroi amoin, in l’éritaz i vo plis in pla lantiy, konm i di dan la Bible. Tok ! Pran sa pou ou !

Justin