« Oplis zako i grinp, oplis i oi son déyèr ! »

Mi pans pa, sa in kozman La Rényon pars sinz - zako, si zot i vé !- la zamé zoué in rol dann nout sosyété. I vé pa dir li rant pa dann nout patrimoine kiltirel, pars dann nout bann zistoir la Rényon, nana osi in pèrsonaz i apèl zako. Arzout èk sa, aforstan, ou i antann in n’afèr ou i fini par pans sa i fé parti out kiltir kansréti par lo tik-tak la kréolizasyon. Donk, si ni arvir dsi nout kozman, i fo ni parl l’asansèr sosyal : nana sak i pran ali dann bon sans, l’èr-la li grinp, é na sak i pran ali dann mové sans, l’èr-la li dsann ziska trap lo fon. Sak i grinp, i parétré li amontr pou vréman son bann défo-son déyèr konm di li kont ! Vré ? Pa vré ? Mi koné pa, mé alon méfyé kant mèm. Alé ! Ni artrouv pli d’van sipétadyé.