Oté

Pri Pinokio 2012 : bann l’antropriz fransé a l’onèr ! Akoz pa l’EDF, la rout litoral sis voi, épi l’izine bagas-sharbon ?

Justin / 29 novanm 2012

Mi sipoz zot i koné Pinokio ? Lo pti pantin an boi lo né i grandi shak foi li rakont mantèr ! Bin, figuir azot, shak ané, bann internot i distribié bann pri Pinokio pou bann l’antropriz i protèz azot èk in parasol vèr, mé i détrui la natir san konté… san sousié pou la santé d’moun épi pou la kalité l’anvironman.

Ala bann loréa, konm i di sa : l’antropriz Lesieur dan la katégori "pli vèr ké vèr" pars li fé son piblisité dsi la bos bann z’Afrikin. In boutèy l’uil pou lo klian, in boutèy pou l’Afrik... solman i dépans in gran kantité l’arzan dan bann agro-karbiran, sak in ga bien koni, Jean Zieglèr, té i apèl in krime kont l’imanité. In n’ot Pri dan la katégori "inn pou tout, tout pou moin" pou l’antropriz Boléra Minéra i rod in métal i apèl litiom pou fé bann batri éléktrik san kas la tèt pou l’anvironman é san pran prékosion l’intéré trant-troi koléktivité indizèn dan l’Arzantine — na in plint an kour ! Areva la gnign lo Pri "la min sal, lo posh plin" pars la-ba dan l’Afrik, li rod l’iraniom san sousié lo déstin bann demoun sak i viv dan l’androi épi i gingn kansèr par dsi kansèr, é Areva lé pa la èk sa. Pou finir, in Pri éspésial pou l’antropriz Vinci, in gran l’antropriz batiman.

Si mi anparl bann Pri-la, sé pars mi koné inn-dé an parmi, mé fransh vérité, mi koné pa tout problèm banna i soulèv, é mi koné pa si zot nana rézon toulbon. Solman, si mi parl dé sa, sé pars moin noré bien trouv moin osi inn-dé l’antropriz dan La Rényon pou gingn lo Pri Pinokio. Kisa ? Inn pou l’EDF, i ézit pa fé l’izine l’éstrisité avèk lo fioul, alé oir nana ankor l’énèrzi ronouvlab pou mèt an valèr dan nout péi, parl pi l’énèrzi la mèr lé la, é i fé pa arien èk sa, pou l’instan. In n’ot pou l’izine bagas-sharbon lo Gol épi Boi-Rouz, pars banna lé résponsab karant pour san la polision lèr ni réspir, é zot i pans pa ranplas lo sharbon par la biomas. Pou finir, in gran Pri pou la Réjion Rénion avèk son prozé rout litoral sis voi ; mi pans sa i mérit azot bien pars konm Pinokio, zot la manié la mansonzri, la déformasion épi la dépans san konté l’arzan Rényoné.

Lo Pri Pinokio pou banna épi pou tout sak i ral an arièr nout l’otonomi dan l’énèrzi épi bann transpor prop.

 Justin 


Kanalreunion.com