Gouvèrnman la Frans na in drol fason oir lé shoz. Pou fé in mové kou kont bann ti-kolon, li lé la, li néna tout lo droi, napoin aryin pou anpèsh son trikmardaz. Solman, pou déside in afèr in pé bon pou nou, ala k’li di : i fo bann partnèr sosyal i mète dakor. Pars solon li : « li pé pa pran z’ot plas »...

Konm sa mèm mésyé Jégo, pars li la avans in pti myète anplis k’i fo, la gingn in koud’zanbèk kan li la parti, an bon zouvriyé la vinn-sinkyèm èr, pou négosyé in goumantasyon salèr la-ba dann la Gwadloup... La shof son zorèy kan li la artourn an Frans.

Fransh vérité ! Kisa i pé goumant lo SMIC, si la pa gouvèrnman ? Kisa, si la pa Léta, i anploy in bonpé ti kontra dann bann gran sèrvis konm lédikasyon nasyonal ?
Alor, si moun vilin na ankor, moun kouyon na pi. É Léta, si i vé, i pé négosyé bann salèr avèk bann sindika, pou son bann ti-travayèr, sak li ésploit dann loutremèr. Lé z’ot patron va négosyé pou sèt zot !

Donkalor, gouvèrnman i koz dann vid ! Li défil an zourit, olèrk diskite lé shoz séryèzman.
Tansyon-pangar, pars konm di lo kont : « Afors alé a l’o, kalbas i pète ! »…

Justin