Nana 120.000 moun La Rénion i koné pa lir, i koné pa ékrir, lé konm Kazimir. Nana 30% shomèr. Nana la moitié dmoun lé mizèr. Nana 285.000 moun i viv avèk bann minima. Bann règlëman l’Erop épï l’OMC i ménas nout dévlopman. Bïdjé la Frans lé in pë fèb. Na pliss péi dan l’Erop solman bïdjé ëropéen i goumant pa an konsékans. Nout pèp lé dinamik, li vë mèt anlèr dévlopman dïrab, èt solidèr son bann voizin, batay kont bann nouvo maladi.

Alor l’alians i poz késtion bann kandida zéléksion prézidan la répïblik : i dmann sinplëman kossa zot i pans nout plat-form dévlopman, si zot lé dakor avèk, si zot lé dakor pou apiy nout rin. Pou zéléksion ki vien, nï vé vot pou nou ! Nou lé an tor ? Sé po rézon nï poz banna késtion.

Shassèr navé lë droi poz késtion, Nicolas Hulot lavé rézon, bann paran zélèv na rézon. Nou non, nou doi « ashté pti koshon dann gouni » épï dir pou kissa nï vot : toutsuit ! Bann vaza linformassion i vë konèt !
Oté lé ga ? San dékoné, akoz pa nou ? Kom di kréol : nou la pèrd nout droi ?

Justin