N’a komans par le débi. Andémya, sa zistoir in rankont rant dalon mizisien. A la baz mèm, sé in zistoir troi marmay la parti étidié la mizik dann péi la fré, à Tourcoing. 2003 ziska 2004, Ludovic Nativel, Gilles Lauret èk Freddy Saint-Ange i afine zot manièr zwé. Soman, toulmoun i koné : kan in rénioné lé loin son péi, son kèr i ral son konplint, demoun i vé artrouv zot rasine, zot mizik, zot rougay. Parlfèt, kan lé troi la rovni La Rénion, zot la retrouv zot bann dalon zwar. Sé komsa Andémya la komans pran form, ansanm d’ot mizisien ankor. Anparmi nana osi Olivyé Mounoussamy, Eric Frégence. Kan Eric la kit le group, Andémya la kroiz la rout ansanm Matthieu Batty, in batèr la bokou èd le group avansé. Dayèr, li la konpoz kat bon morso, zot i pé antann dési le CD Andémya. Eric Hoareau la vni mèt son kou-d-saxo. Koméla, kan Gilles Lauret i mazine listoir son group, li voi koman Andémya la levé d’in kou. Premié sorti po le group, lété dan in ti bar Létansalé, le Patatex. Aprésa, zot la shanté bonpé L’Etoile du Sud, in ot bar Létansalé. Kan lèr l’arivé zot la pass Clameur des Bambous, zot la fé sansasion, demoun la émé. Aprésa, bonpé zafèr la espasé. Rougail Rock, le tremplin du rock, le carrefour des jeunes au Tampon, Miel vert, Florilèges, Palaxa, Pueblo, le Sakifo 2008, biento nou va trouv azot po Mizik a pat, Florilèges ankor, oubiensa konsèr po Granmèrkal à Saint-Gilles. Kisa la zamé antann Andémya ? E bien, zot la pèrd ...

Mèt Andémya dann gran festival, don !

Na pa lontan, bann Andémya la bouz an Frans, po inn tourné si la kot landèz. Capbreton, Hossegor, Soustons, Bidart, Seignosses anparmi. An tou, banna la fé 10 dat. Demoun té étoné antann in rock osi andiablé. Andémya i fabrik in rock la brèz, in rock i dans. Demoun an Franss, té di zot téi koné la Rénion porézon nout ti zil loséan Indien na joli roulo po surfé. Astèr, zot i koné Andémya. Ni espèr emoun laba la aprésié in lègzanp nout mizik rénioné. Banna in rakont anou in lanèkdote komik mèm. A-pèn arivé an Franss, si trottoir Orly, la bann Andémya la komanss larg détroi moros, ziss po shof la min dann péi la fré. In group demoun la akosté po venir ékouté. Andémya té éton, kan in lamérikin la done azot in biyé 100 dolar po remèrsi azot. Parlfèt, banna la done ali in CD. « Sété nout méyèr vant lané » i plézant Olivyé Mounoussamy. Astèr, po Andémya, sat i fo, sé tourné dann gran festival an Franss. Bann zorèy i riskab èt vréman étoné. Kan banna la pass Sakifo festival Muzik si koté Tèrsint, Andémya la mèt defé. Ziska bizar la pa zot la gingn la pri Alain Péters ! Oté, si zot i kroi pa moin, alé gèt si Intèrnèt le klip banna la fé, oubiensa ashèt "Sézismen", zot Cd la sort an désanm 2007.

 Bbj 

Bal la pousièr po bann gramoun

Lasosiasion Solèy Réyoné i invit bann gramoun po in bal la pousièr shé Mao à Sinlé. Sèt aprémidi, à partir 1 èr ziska 5 èr laprémidi, Fred Espel i zwé séga violon po zot, ansanm Suzette Lacaille. Dimansh i vien là, nora Claude Vinh San i fé lanimasion.
Informasion : 0692.04.11.22.