La Frans nana in nouvo prézidan, nana in nouvo gouvernman pou mèt an plas in politik la"rupture". Pou bann ti-kolon, kossa i lé sa ? Sa i vé dir, i sanz in kou. Donkalor, in politik sanzman. Mé kèl kalité ? In bon shanjman ou sansa in fotrin ? Sa lé a oir, mé nout léspoir, pou déssèrtin zafèr, lé riskab kas par bout.

Lo SMIC la goumant zis pou sèy trap goumantation la vi, pa in grin an plis. Bann minima sosio la goumant moins ankor. RMI avèk l’alokasion pou bann andikapé, la pa goumant inn tiork. Lalokasion rantré éskolèr, i bouz ar près pa. Azout ankor la fransiz sï vizit doktèr, radio, lanaliz, sinkant santime l’euro par médikaman ! I doz anou-la !

Aprésa, va siprime dis mil plas travay dann lédikasion nasional, pétèt plis, trant mil post fonksionèr pétèt plis. I vé tir tribinal grann instans Sin-Pièr : alor si ou nana in n’afèr d’loi in pé konsékan, file Sin-ni. Épi, tout moun i travay la-ba, lavoka li, zanploiyé li, ziz li, kour Sin-ni galman ? Alé dormi, don !

Apark’sa, gouvèrnman la di : « Travay plis, larzan va gréné ! ». Oté ! lé ga, kont déssi, fyé pa tro ! Pèr noèl i ran pi !

Justin