A soir, lo kor in gran zartiss La-Rényon i ar’rant o péi. Auguste Lacaussade i ar’vien par lavion, san konprann. 109 an la pasé, avan-k i respèk son dernié volonté. Demin, nana in takon sérémoni an fonksion lo gran travay boug-là la fé po défann bann zoprimé. Lésklavaz té batt son plin kan li té viv. Li la batay po bann zoprimé poloné, soman li la pa oublié kèl valèr li lavé, li, zanfan in zafranshi.

Demin, i fo nou lé bonpé pou rann ali in dernié omaz. Porézon li la zamé aksèp lamaraz demoun, konm lamaraz lespri. Li la vienbou fé antan ali laba Pari. Zordi, son bann tèks lé étidié dann liniversité. Afèr i mèt pa ankor pliss dann lékol, kolèz, lisé ?

Ala in zarlor i fo n’i vienbou mèt anlèr. Zordi, nou la gingn fé respèk son dernié volonté. Li sar ropozé Hell-Bourg. Sa la porézon bann zétidian rénioné responsab, èk Prosper Eve, in gran lamontrèr nout listoir, la mèt ansanm. Auguste, dawar, i di mersi.

 Justin