I sort fé in séminèr rant bann nasyon déssi la késtionn rasism : nout tout i koné sa in gran kèstyon i pouri la vi tan-é-tann moun.
Mé plito k’di : i sort fé, noré été pli préférab di : "l’apré sèy fé", pars in bann péi té i vé koul lo z’afèr zis avan k’i komans : bann Zéta-Z’ini, bann Israèl, épi in tralé péi Lérop la parti...
Pou kossa ? Pars d’apré zot, lo prézidan l’Iran té i sar mète Israèl an akizasyon.
Mé sa i fé mazine amoin dé zafèr !

Inn, déssi sak bann sèrvis sékré Zéta-Z’ini la fé, avèk l’akor G. Bush : la tortir bann prizonyé, la mèm invant tout sort kalité tortir nouvèl, pli barbar inn ké l’ot. Lo nouvo prézidan la di i fèr ar-pi, mé bann tortirèr nora poin pou rann kont dovan tribinal. Oui lo frèr, mèm Bush nora poin pou rann kont ! Pétèt pars bann viktime sé bann zarab ! Sa la pa rasis sa ?

Dézyinm zafèr : Israèl la fé la guèr bann Paléstinyin avèk tout sort kalité z’arm, mèm avèk in n’afèr i apèl fosfor blan. Sa i bril in pé la po. Apré sa ou lé kite ! Ou lé kite ? Non, sa i kontinyé travay aou in bann moi apré, i atak la shèr, i atak bann z’organe, épi lo zo ziska. I prétan lé konm in fé k’i bril aou é i bril san arété ! Oui, mé i fé sa bann Paléstinyin, bann Mizilman, la pa bann bon blan. Sa i apèl pa rasism sa ?

Plito k’akiz lé zot, konm di lo kont :"Kan in n’afèr i san mové, mi komans par agard avan déssou mon soulyé !".

Justin