Nou na in patoi i di konm sa : « Karapat i mont déssi tété bèf mèg ! ». I pé pa di kozman-la lé mantèr ; i pé pa dir i di pa lo pli vré. Kan in bèf lé gra, karapat i gingn pa fé arien kont li, mé kant in bèf lé mèg, lé malad i gingn pa tro bouzé, tout karapat lé pou li. Lé ga ! Sa i anpèsh pa zot soingn z’ot bèf, akoz sa la pa in fatalité.

Sa i amène amoin a gard in pé lé z’alantour, dann la sosiété ni viv, épi mi rann amoin kont par moin-mèm, kisoi in moun, kisoi in famiy, kisoi in vié moun, kan lé dann la difikilté, ankor plis la difikilté i tonm déssi : mizèr é konpagni !

Agard bann moun nana érémi ! Zot na poin lo pourkoi konm k’i fo, lé dir pou zot zouin lé dé boute lo moi par lo milié. Sa lé vré sa ! Ala k’an plis gouvèrnman i domann i kontrol azot dir, épi si na in n’afèr i klosh pa, koupé lo érémi, konm si lo moun sé in volèr, in parazite dann la sosiété, konm si li vé vréman viv an mizèr, an létranzé dann la sosiété son péi, an grinn bébé dann panié mayi, an kiyèr sal dann manzé la pa pou li...

Apré i di ali, domin sar méyèr, sar plis mié. Malérèzman, avèk domin i fé pa komission. Avèk domin i sar pa la boutik. Avèk domin i ariv pa la gar ! Fransh vérité !

 Justin