Matante Zélida la ékrir Justin. Mon shèr nové, i falé moin té ékrir aou sa. Moin la pass koté Sint-Sizane dimansh. Kossa moin la vi ? In bann roulète an métal apré tourné-artourné, fé z’ot tourné-viré konm bann gran bébète an métal, riskab koup lo zèl bann z’anz si i pass tro pré... Alor, an moin-mèm, moin la mazine kossa i éspas kan la kouyonad i karsèr léspri lo mond. Demoun la faim, larzan lé rar, marshandiz dann konzolatèr lé rakokiyé dann fon, épi ala bann zéli i kalkil fé zouzoute pou marmay rogardé. Sa la pa rédikil in n’afèr konmsa ?

Justin la réponn aèl : Ma tante, ou la di « rédikil » ? A bon, bann z’éoliènn lé rédikil ? Sa i transform lo van an kouran éléktrik. Li la pa bézoin sharbon, li ansèrv pa gazole, i dépans pa larzan pou ashté. Li lé prop, li lé dirab, li lé éfikas. Li voiyaz pa dann vant bato, dann rézèrvoir kamion, dann wagon, mèm pa in sasé plastik pou sharoy ali. A bon, li fé dézord ? Pliské l’avion ? Plis ké bann motèr loto ? Non, la pa vré sa, sirtou si pou drèss azot, i réspèk la distans. Azout avèk sa son jolité, son lélégans, son l’itilité : in park konm nana Sint-Sizane i niabou donn kouran la moitié la komine. Alor, matante Zélida, mi koné pa kissa, sansa kossa, lé ridikil, mé la pa lo bann z’éolienn.

Zot i tourn z’ot gran bra dann sièl, konm pou di lo van : “Vien aou pou donn kouran kréol ! Ou mèm nou la bézoin !”

Justin