Téléfone i sonn dann mon posh, avèk pène mi niabou rouvèr ali :
Justin : Alo ! Kissa i lé ? Gro-boush sa ? Kossa ou i vé ?
Gro boush : Alo, Justin oussa ou i lé ?
Justin : Ko-k’i-pé fout aou ? Moin l’apré fé in klé, nétoy zardin n’moun ! Aou ?
Gro boush : Moin ossi, moin l’apré mont in mir, o blak bien sir... sa pou pèy lékol maron pou mon zanfan, vik koméla i fé pi lékol samdi é i pé pa lèss marmay dan la kouyonis.
Justin : moin ossi pou sa mèm... Alé, ni artrouv !
Téléfone i arsone toutsuit.
Justin : Alo ! Sé ou sa tantine ? Kossa la fé ?
Tantine : sé pou dir aou moin la trouv in pti klé pou fé pou pèy in pé nout krédi... Mi sar fé in ropassaz. Lo samdi... sa in klé o blak sa ! Ou na ankor pou lontan-la ?
Justin : Mi komans zis...épi téléfone i arète pa soné !
Tantine bandé i fèrm téléfone, mé li argrinng ankor in kou.
Justin : Alo, kissa i lé ?
Nini : Lasido, ou pé passé asoir, Zilo i sava la pèsh, alor nou nora nout tan.
Justin : Ou ossi lé o blak alor ? É, éskiz mon pardon, moin la pa Lasido, moin, ou la fé in lérèr.
Nini : Spès malprop ! Akoz ou la pa di avan ou té pa lasido. Malfondé ! Spès tète de shiass !
Èk la raz, èl i fèrm také téléfone. Kant-a-moin, konm marmay lékol, mi résite : « blak ! blakon !blaké ! » Sa i tonm linpératif sa ? Alé, na artrouvé !

Justin