Kan i ariv in z’éléksyon, demoun i domann kisa i lé nout kandida ? Kan i réponn : « Nout kandida, sé La Rényon ! », demoun sak na l’éspri in pé kourt i kalkil sa in répons an foutan, pars pou zot, sa i vé dir k’i shoizi pa rant in bann demoun ni koné pa é ni lès azot roul zot kari rantre zot. Sak l’éspri lé pa tayé pou èt kourt, konm désèrtin zournalis, mèm si zot i konpran, zot i fé konmsi lété in n’afèr na poin lo sans. Poitan, sanm pou moin, sa sé in n’afèr i dovré èt fasil pou konprann. Sof kèl z’éléksyon, nou Rényoné, ni agard kèl konsékans sa nana pou nou, gran konsékans konm pti konsékans, konsékans pou toutsuit, pou domin konm pou apré domin. La prèv pou nou, sa lé inportan ? Shak foi ni propoz in program, pars in kandida san in program, sa i kont pa. In program pou la Frans, an zénéral, sa na poinn sans pou nou, pars li lé tayé pou dmoun i viv dan l’Erop, dann péi dévlopé. Nou, nou lé dan l’oséan Indien é nou la pankor gingn trap nout dévlopman konm k’i fo. Si désèrtin poin lé bon sansa lé pa bon pou nou konm pou la Frans an zénéral, mé la pa in program konplé tayé pou nou ; sé pou sa ni propoz in program pou La Rényon, sé pou sa nout kandida, sé La Rényon. Sa lé vré pou tout z’éléksyon, kisoi z’éléksyon lo mèr, Konsèy zénéral, dépité, sénatèr konm prézidan la Répiblik. Dann tou lé ka, nout kandida, sé La Rényon ; la pa pou kas lé kui mi di sa, mé pars sé zis la in vérité mi souèt demoun i pé konprann fasilman.

NB : Sa lé vré pou z’éléksyon lo mèr Sint-Sizane galman, épi konm Maurice sé lo sèl kandida lo sèl parti rényoné, vot pou li, sé vot pou La Rényon. Vot pou lé zot, sé vot kont La Rényon... lé konm sa é pa otroman.

 Justin