Matante Zélida la ékrir Justin :
Mon shèr nové, mon spès salté,
Mi éspèr ou la vi lo rézilta la politik bann rouj de fon : in politik si tèlman an dégréné ké koméla na pi aryink bann jenn lé délinkan, bann marmay ossi lé an parmi. Ou koné dékoué mi vé parlé ? Non ? Ou la pa antann la-ba dann la Frans, la polis té blizé karsèr dé marmay, inn nana dizan, l’ot nana sizan, pars zot la vol vélo in n’ot marmay, son famiy té i sort ashté. É olèrk félisite la polis, bann rouj i trouv moiyin krétiké.
A ! Krétiké lé fasil, mé fèr lé pli difisil ! Kontinyé konmsa, apré si la tèr i tourn konm in toupiy san nay, alé pa rod kissa lé résponsab : agard azot dann in glas, nora assé !

Justin la fé aèl pou répons :
Mon vyé-matant-touzour-dan-lérèr,
Domaz ou la pa ékout radyo konm k’i fo ! Ou nora pi konète dé marmay-la la pa vol aryin, pars zot ossi zot lavé in vélo parèy, zot famiy l’avé kado azot. Ou nora pi savoir galman, la polis la kaziman karsèr lé dé marmay san k’zot famiy i koné, épi la tyinbo azot dé zèr-d’tan.
Matant, mi vé pa dir aou na poin la délinkans ; mi vé solman dir la polis i doi trèt demoun an réspé, kisoi bann jenn, kisoi bann marmay, kisoi bann grann pèrsone. Pars, si i kontinyé komsa, va trouv in n’ot katégori soi-dizan lé mal fézan. So kou issi, sora bann vyéy pèrsone. Dan shak jenn nana in délinkan k’i somèy ? Dann shak marmay galman ? Ou byin, konm di lo kont, dann shak moun, nana in koshon k’i dor ? Bin alor, la lé grav !

Justin