Kan k’in moun i rant dann i kaz la pa li, i pran inn-dé z’afèr la pa li galman, kréol i trèt ali volèr ! É nom-la i mérit ali !
Kan k’in moun i travay par-la, i konfonn lo kont lantropriz avèk la syènn, i fé pass shèk pou lantropriz déssi son prop kont, kréol i trèt ali volèr, sansa éskro, sansa ankor d’ot ti-mo mi souète pa pèrsone gingn sa dan la figir. Bann nom-la i mérite ali, byinsir !
Kan k’in mèr i profit son manda pou li anrishi ali, pou li gonf son pla pou vréman, lé riskab… suivan la tèt !... tribinal i kondane ali, pars li la fé in n’afèr k’i fo pa. Alor, kréol i trèt ali volèr, i mank pa di son nom dann radyo, sansa donn tout détay pou k’i rokoné ali. Dizon k’i mérite ali !
Mé kant in gouvèrnman i pran larzan lo RSA lé déstiné pou bann moun i travay pa épi nana bann minima. Kan li désid donn sa pou goumant in pé bann ti larzan lo moi pou gonf in pti pé zot pla, koman i fo apèl in gouvèrnman konmsa ? Kèl ti nom gaté i fo donn ali é k’i mérit ali ? Dovine, dovinay ! In mo sink lèt k’i komans par “v" é k’i fini par "r" ?

Justin