Oté ! Mi koné pa si zot la vi sa ! In sandouish bann zamérikin i manz... Daoir par-la sink san gram do pin, épi sink san gram la viann. Azout ankor tousa kalité la sos, épi lo koméraz i mète ansanm. Pou tienbo lo z’afèr an ékilib, i fish in kouto anndan. Dizon in sandouish mèm i fé plis k’in ropa pou in moun normal.

Alor, moin la parti rod konbien lo blé, sansa konbien mayi i fo pou fé in kilo la viann. Rozman moin té asiz, otroman moin té riskab kalbité. I fo uit kilo manzé pou in bèf fé in kilo la viann. Dizon kan in lamérikin i manz son bèl papa sandouish, lété konm si li té i manz plis kat kilo sak banna i apèl séréal, kat kilo plis in liv.

Moin la mazine bann z’imaz i oi souvan dé foi dann télé : bann zanfan mèg vèy pa koman, apré mor dann bra z’ot momon. Moin la pans bann moun Haïti, nasion kréol konm nou, i manz galète la tèr pou sèy fé arète z’ot vant kriyé.

Moin la konm antandi bann parol lo prézidan la FAO té apré di l’agrikiltir i vien a bou donn manzé douz miliar d’moun. Mi pans lé vré, mé si lo partaz lé inzist konm sa, i gingn ar pa zamé nouri toulmoun*. Sa lé sir !

* Dann koméraz la fé Rom la-ba, banna la pa di i fo nouri toulmoun. La di solman i fo diminié la famine par moitié. Bin, lé z’ot ? Kossa i fé avèk ? Anvoy krévé, sirman...

Justin