Listoir-la, sa sèt in gran militèr té paré pou mor zisk’o dèrnié, ziska son dèrnié kartoush. Li té paré pou fé la guèr a mor bann larmé komor, bann larmé té i sort l’Afrik, mèm larmé bann Fransé. Plito mor an plas ké kite son péi, Anjouan. Sa lé mèrvéyé, formidab, éroïk, é pourtan pa vré. Kan bann la monte le lopérasion, “démokrasi dann bann zil komor” la komans bouzé, kan lo prézidan la sign in l’ord pou bann larmé débarké, tout demoun té pèr : té i sava fé in bain lo san épi konm di l’ot « i koné koman k’i komans, i koné pa koman k’i fini ».

Anfin, la guèr la pété épi tout suit bann z’atakan la romark la résistans té mol. Kan l’ariv lo palé lo prézidan, li té vide, lo kolonèl Bacary té fine baré, li té fine ariv Mayotte déguizé an fanm (!). Ousa li lété ? La kaz son pti frèr. Biensir, larmé fransèz lavé fé tout pou anpèsh lo boug vnir Mayotte, lavé mète lo paké, mé lo boug la niabou filoshé... Alé dormi don ! Kissa i sa kroir in nafèr konmsa ? komor li, maoré li, rénioné li ? Oté ! Fèr kroir-la, sa in métié, oui sa !

Justin