Sé kan ou lé atèr ké ou i arlèv ! Sé kan ou lé an difikilté ké ou i trouv in solisyon pou tir aou dann malizé ! Sa lé vré pou in péi, sa lé vré pou in pèp, sa lé vré galman pou in moun ! La pa kan ou lé a flo, kan i mank pa ou aryin, kan ou na lo pourboi an sifizans ké ou i sava forsé pou mète aou anlèr !
Yèr kan in pé téi bénfisyé la défiskalizasyon, kan la bank téi prèt azot larzan san konté, kan bann z’aksyonèr té i gonf z’ot pla déssi l’do bann travayèr ! La pa dann la sintir bann gro vaza la fé in trou an plis pou pèz déssi zot vant, sé dann sintir bann ti-kolon. Alor zordi zot i s’anplègn ? Kont pa dsi nou pou mouy nout moushoir pou zot !
An kontrèr, sé lèr k’ni domann pou goumant bann salèr, pou diminyé bann pri, pou donn travay kréol, pars é sa k’i fo !... Kosa, zot i parl anou zot loi lékonomi ? Zot i koné sa zot ? Si zot téi koné, lé shoz noré pa été konmsa ! Zot kozman, zot règloman, sa i pas pi, vik sé foutèz é konpagni !

Justin