Pou kosa la guèr ? Pou kosa la guèr ankor ? Sa i sort dann in shanson Dédé Lansor, in group maloya demoun i èm la kultur, i vé mète aèl anlèr, i komans konète. Pou kosa la guèr ? Près mil mor dan la Paléstine, é pa arienk solda... Pli loin k’sa, la-ba koté l’Inn, mé pli pré dann nout kèr, la-ba dann Sri-Lanka, bann rebèl tamoul, gouvèrnman i atak azot. Dë péi dan la guèr dépi lontan, mé dë péi ousa i sava fé zéléksion... Zot trouv pa sa lé in pé bizar, non ! Lé pa possib ! I fé pa la guèr arienk pou gingn zéléksion... nana arienk demoun léspri lé mal tourné k’i pé mazine in n’afèr konmsa ! Poitan, na in pé i di sa... na zournalis i di sa... nana moun kalifié i di sa ossi ? Lé vré, lé pa vré ? Pétète lé vré konm pa... solman sak lé sir sék si banna i gingn la guèr, bann zéléktèr lé riskab vote pou zot an kantité, épi zot na in shans gingn zéléksion. Kossa ? Zot i pans mi déray konm lotoray ? Zot i pans mon léspri lé mal tourné ? Poitan, dann mon vi, moin lé fine oir d’zafèr konmsa, moin lé fine antann parl la provokasion... néna mèm inn-dé péi, inn-dé sèrvis ségré, inn-dé polis kapitalis épi dominèr i fé la provokasion pou gingn lokazion fé la guèr. Épi, si bann zanfan, bann vié, bann madam an voi d’famiy i mor, alé pa kroir la fé par éspré, mé i fé pa zomelète san kass dézèf !

Justin