Dépi in bout tan, dépi k’li la gingn in kou d’rès trankil la-ba Sintandré, pou zéléksyon lo mèr, té i antann pi ali tro..li l’avé di li-mem, li sava fé in n’afèr byin réspéktab, okip son tan pou pratik in pé byin son rol granpèr. Mé, dépi in sèrtin tan Virapoulé, la arkomans bouz in pé — daoir, pétète, pars zéléksyon rézyonal i tard pa.
Konm dabitid, kan lo lou i sort dann boi, nana touzour in éréfo i pass par-la, épi i done ali la parol, défoi k’li bouz ankor in pé, k’li gingn atak ankor in pé konsèy rézyonal épi son prézidan, fé d’tor parti kominis, finn-kont mète in pé plis dann malizé zintéré lo pèp rényoné.
Donk, zoro l’arivé : ala k’li dépoz in loi dovan l’Sénat soi-dizan pou fé bès lo pri bann marshandiz, ala k’li domann in règloman pou k’i pèy bann plantèr in prime bagass mèm pri k’sharbonn, ala k’li fé son parti k’i apèl pi la rolèv mé TVA — limazinasyon i mank pa li ! Solman lo kou la manké vik lo pri bann marshandiz banna l’apré règ sa par la diskisyon épi par la manifèstasyon, vik son propzisyon pou la bagass bann plantèr lé pa dakor ansanm... Ala k’li vé anpèsh fé la mézo dé sivilizasyon, mé, mi dout pa k’so plan va kas par bout.
Pars, fransh vérité, i gard pi lèr déssi révèy i marsh pi !

Justin