Déssèrtin i di konmsa, l’ékonomi La Rényon lé an kriz, donk sak i fo fèr, sé trouv in plan pou sort dann malizé… apré lé shoz va arkomans roul ron. Sa sé z’ot lésplikasyon, mé moin personnel, mi pans sa lé in pé kourte, pars si ni rotourn inn-dé z’ané an aryèr, ni apèrsoi l’avé poin ankor la kriz mondyal, mé nout zétoil té i briy kant mèm pa. In gran kantité shomèr, in gran kantité érémi, in takon pti rotrète, in mank lozman sosyal, in bonpé z’ilétré... donkalor, ni oi byin lo lésplikasyon lé pa sifizan. Arzoute si Jégo l’avé pa pri son loi, la défiskalizasyon noré kontinyé son l’éfé konm pèrfizyon dann kor in malad. Armète èk sa k’in bann démolissèr, dépi Sinni ziska Tampon, la fou koud’pyé dann larzan fète é fourni. I fo rogrété galman k’in bann moun inkonsékan la fé toute kalité mové kou pou anpèsh bann projé avans konm k’i fo. Mète ankor dann panyé larzan l’Éta i doi Konsèy zénéral é i pèy pa. Zot i pé konprann koman sa i fé anou d’tor. Sa i vé dir, si l’avé poin sa, nou noré pa gingn lo kou anplis avèk la kriz mondyal, mé nou nora gingn lo kou vi ké nou noré kontinyé ète mayé dan la kriz kant mèm... alor lésplikasyon lé pa sak moin la ékrir, mé plito in dévlopman insifizan… in gran défisite dévlopman.

 Justin