Si in zour, in l’istorien i déside ékri listoir Parti kominis rényoné, moin lé sir li mank ar pa romark koman parti-la l’avé dann kèr son konba lo dévlopman La Rényon. Dépi l’ané 1959, l’ané li lé éné, li la fé plizyèr plan pou dévlopman La Rényon. Sa sé la vérité, é la pa pars in pé na poin la mémoir, na poin la sèrvèl ké sa lé pa vré. Pou nou, militan, dévlopman sa i porte pa sèlman déssi l’ékonomi, sa i porte galman déssi lo sosyal, lo kiltirèl é la défans la natir. Dépi komansman nout listoir, nou la tienbo kont lo dévlopman dirab, mèm avan ké le mo i vien a la mode.
Zordi, lé rogrétann dir na in pé i tiliz lo mo, mé si lo mo lé la, l’intèryèr sé in kokiy vide. Poitan, a bien rogardé, la tèr lé kondané a mète anlèr in dévlopman dirab, é sak i rokonète pa sa, in zour la pa demin, zot i artrouv azot dann in gran difikilté ; Pli pir, zot i mète l’imanité dann in gran difikilté. Zot i fout anou dann l’éshofman klimatik, zot i kondane plis in milyar d’moun pou mor d’fain. Arzoute èk sa la guèr, lépidémi, é toute sort kalité tablatir nana zordi. Pétète, pa plis ké yèr, mé zordi, lé myé koni… la pa pou sa lé pli fasil pou vanj kont sa.
Donk, pou arvni déssi nout komansman. Parti kominis la touzour sousyé lo dévlopman La Rényon, mé pa solman, pars natirèlman, li nana dann kèr la solidarité avèk bann pèp-rasine pou nou, bann péi nout zansète i sor, li sousyé pou nout bann péi-rasine. Mi pans mèm, nout parti lé si tèlman internasyonalis ké li sousyé pou tout bann péi é tout bann pèp déssi la tèr. I di souvan la tèr sé in gro vilaz é nout tout i doi ète solidèr. Mi pans sé sa nout fyèrté, é in zour, kan va fé koz listoir, va oir kisa té dann bon é kisa té dann mové koté. Konm di lo patoi : « Bondyé va rokonète son bann ! ».

Justin