Matante Zélida la ékrir Justin : Mon shèr nové, mon spès salté, moin la byin lir la list l’Alyans pou zéléksyon. Mi trouv, zot bann rouj-de-fon, zot i an-mank pa d’toupé. Pou kossa mi di sa ? Lé sinp, pars konm i di, avan k’i pass l’Alyans, i fo k’i èm... Ki i èm ki la-dan ? In bann moun i sort sé pa ousa, la zamé fé in karyèr ansanm, na poin lontan lété inn kont l’ote pou d’ot zéléksyon, ala zot lé ansanm zordi. Pou fé kossa ? In pé va tir in koté, in pé va tir in n’ot koté, konm mové bèf mal dréssé... ziskatan sharète va kalbite dann la kivète ? Byinsir, zot i sousyé pa d’sa zot zordi, mé sé nou k’lé riskab pran le shok, pèy lo ralé-poussé k’i mank ar pa d’arivé. Tok ! Pran sa pou toi !

Justin la fé pou répons : Mon vyé matant k’i koz touzour la boush rouvèr, ou i konfonn o-tour avèk alantour ou la ! Sé pa in késtyonn viv ansanm, mé sé plito d’travay ansanm. Sa la pa mèm z’afèr. Sak i konte, sé si lo lékip lé dakor avèk lo bann prozé : kossa i sava fé, pou kossa i fé sa, koman i fé, kèl bon rézilta va trapé... Kan la fine tonm d’akor déssi bann késtyon-la, na in lantant sifizan épi anvoyé lo z’afèr. Kossa k’i ansèrv ème konm patate an krèm si ou i vé pa alé o-mèm-bi ? Sak i kont, sé lo bi, é lo bi sé avans in pé dann shominn dévlopman nout péi, sèy anpèsh bann l’antropriz dékaniyé, ardone kréol travay... épi trouv bon solissyon pou aranz in pé la vi bann z’abandoné, bann z’ékskli. Konm ou i oi, travay i mank pa !

 Justin