Zordi i tonm la zourné éropéinn bann lang. Sa i vé dir sé tinn zour pour mét la lang dovan. Sa i vé dir lérop i éstime tout bann lang lé inportant.
Nout kréol inn lang éropéinn, daborinn akoz La Rénion lé zordi dann Lérop, ansuit akoz la manièr li la énét lé mayé sanm la kolonizasion éropéinn dann tan lontan.
Lérop i rokonét nout lang, la Frans i rokonét nout lang, na rienk anou-minm pou di, parfoi, kréol in dialekt, sinon in patoi, mé pa inn lang. Pou sat i pans ankor dann in manièr koma, kréol lé pa inn lang, li na poinn "grammaire", poinn "l’orthographe"... li sé moink rien. Kél méyèr manyèr mont kréol sé tinn lang, sinonn kozé, sinonn lir, sinonn ékrir ali.

Zistin