I antann plizanplis parl lésploitasyon lo gaz de shiste. L’ané 2010, minis l’Ékoloji la France la sign an misouk in sinkantène kontra pou donn l’otorizasyon bann gran sosyété pétrolyèr pou alé fouiyé pou oir si nana lo gaz in pé partou dann lo péi. La-ba, dann l’Amérik, i diré la fine pran l’avans déssi késtyon-la. Mèm bann Shinoi l’apré rode térin dann l’Amérik di Nor pou zot fouiyé.
Bon nouvèl, mové nouvèl ? Bon nouvèl, vi k’sa i amontr nana lénèrzi in pé partou déssi la tèr, é pa forséman dann landroi nana lo plis pétrol. Bon nouvèl pou bann gran sosyété i sava gonf ankor in pé plis zot pla. Mové nouvèl pou sak i konsidèr dévlopman dirab kaziman konm in rolizyon. Mové nouvèl galman pou sak i sèy vanj kont l’éshofman klima, pars lésploitasyon lo gaz va difiz dann l’èr bann gaz avèk l’éfé d’sèr, konm gaz karbonik épi d’ot ankor. Mové nouvèl pou sak i pans, ankor in kou, demoun l’apré zoué avèk la vi la planèt, épi pou bann péi lé pa tro dsi la otèr é lé riskab noiy dan la mèr.
Bann gran péi i kass pa la tète pou sa. Pou zot, i fo an avoir in bon rézilta lo pli vite possib, tanpir si sa i fé déga é aprésa lé malizé pou réparé, konm bann maré noir la koul in pé partou é pa pli lon ké l’ané passé déssi bord-mèr l’Amérik, konm volkan la bou i koul nuite konm jour dann l’Indonézi, pars in sosyété inkonsékan la pa étidyé lo risk avan fouiy in pui plis troi mil mète profondèr. La bou i romonte, i romonte ankor, é i prétan dir sa va dir ankor o moins trantan dann l’il Java.
Baz l’avnir déssi bann gaz de shiste lé inkonsékan. L’inkonsékans lé danzéré, é li lé mèm initil kan dévlopman dirab i sifi.

NB : Le volcan de boue de Sidoarjo est situé dans l’est de l’île de Java, au sud de la capitale provinciale de Surabaya. Ce volcan de boue est né le 28 mai 2006 dans le kabupaten de Sidoarjo, une zone densément peuplée et cultivée. Les coulées ont enseveli à de nombreuses reprises des villages, des voies de communication et des champs malgré la construction de nombreuses digues de rétention, constituant une des plus grandes catastrophes économiques et écologiques de l’Indonésie.

Justin