An parmi bann tram nana dan La Frans, sak lé pli zoli, solon mon gou, sé lo tram Montpellier. Zot i koné vil-la ? Sa in gran vil, épi nana bonpé d’moun i sorte l’Outre-mer opu fé zétide, sansa pou travay, sinonsa pars zot l’ariv la, zot i koné pa tro byin pou koué. Touléka, kan ou i koz avèk zot, i di aou zot i èm byin so vil-la, plis ankor dépi nana lo tram k’i amène a zot ou a pépré landroi ousa zot i vé alé san fé dézorde é la plipar d’tan san bouskilaz.
I fo oir lo tram la-ba : inn lé blan èk pti motif blé, l’ote lé kouvèr avèk pétale flèr toute koulèr. I fo oir koman dodan lé byin klèr, byin roganizé... I paré, mé moin la pa vi, lo troizyèm lign i rouv l’ané 2012, sar ankor pli zoli. Sé bann gran koutiryé la fé lo dékorasyon.
Zot va di amoin la pa solman lo zoli demoun i rode, mé galman la komodité. Pou ète komode, li lé pou vréman… La prèv ? Ala èl la ! Nana san katrovin dis mil pèrsone i pran tram-la dan la zourné déssi in parkour trann sink kilomète. Avèk lo troizyèm lign nora, san tardé, sinkante kilomète lo ray, é va dépass lo dé san mil voiyazèr.
Par l’fète zot i koné sé in madam sosyalis lé mèr la komine ? Zot i koné ossi prézidan la Réjyon, sé ossi in boug la gosh ? Sé zo épi toulmoun an zénéral la vuli lo tram. Alors, akoz parti sosyalis lé pou tram-train la-ba é kont nout tram issi ? Alé konprann ! Sof a dir parti sosyalis La Rényon, lé an parmi bann gosh la pli bète di mond.

Justin