La koup di mond foutbal la fine komanssé. In bon pé d’moun i gard bann match, in pé l’ashète gran télé fantézi aryink pou sa. Sa lé sir, vi k’ léspor-la, lé popilèr pou vréman, dann près toute péi… La Rényon, dann ta, byin antandi. Alors, i antann dann bann radyo wawa, demoun apré di si, apré di sa, apré di lo lantrénèr la pa pran lé zonm k’i fo, sansa la pa mète azot landroi k’i konvyin. Final de kont, in pé i di, bann jouèr lé tro péyé, pou sa-mèm zot i joué pa byin, pou sa-mèm zot i mouye pa zot mayo. Ala l’afèr, sé pi in zé d’éspor, sé in zé d’larzan, sé in zé d’politik. Byinsir, i pé di sa konmsa ! Mé kissa ankor té i kroi léspor proféssyonèl, son bi sé solman pou réspèk la valèr moral, mète lo fèr-play anlèr, dévlop l’éspri shovalorèss san-pour-san ? Lé vré, sé sak i di, mé kissa k’i kroi sa pou vréman ? L’UEFA, la lig foutbal proféssyonèl, lo bann gran klub, la koupe di mond èl-mèm, sa i manyé larzan an poundyak, par milyar. Sa ni koné ! Solman sa i anpèsh pa nou rogarde l’éspéktak dann télé, pars nou ossi, ni èm rogarde l’éspéktak, sa i digdig, nout dossou d’pyé… Pli pir, ni koné déssèrtin gouvèrnman, i tourn otour d’bann foutbalèr, pou lo ka si i gingn bann match, zot i argingn in pé la popilarité. Banna i koné nou va kriy, alé bann blé, alé bann rouz, alé bann vèr, zot i koné nou sar kontan, ou byin shagriné, ou byin an kolèr. Toulfason, lo spor proféssyonèl va nyabou trap son bi... amorti in pé nout kolèr, pass in pé la pomade déssi noute bann doulèr fizik ou byin moral, ède gouvèrnman asoupi in pé nout konsyans. Konm bann romin téi di : Kossa lo pèp i vé ? Do pain èk bann zé d’sirk !

 Justin