L’INSEE i donn shak ané in l’indikasyon déssi lo kantité d’moun lé ilétré dann La Rényon. In moun ilétré, kosa i lé ? I paré sé in moun i gingn pa byin, sansa i gingn pa ditou, lir épi ékrir. I paré nana ankor issi plis san mil pèrsone lé ilétré. Poitan, lékol lé gratuit é mèm obligatoir dépi lontan. I pé dir près tout demoun la gingn in plas dann in lékol l’èr li la gingn laz pou alé. Poitan, bann z’amontrèr la gingn in bon formasyon dann la pédagozi. Sa in sitiasyon lé difisil viv pou bann z’ilétré zot mèm, pars lé dir pou zot aprann in bon métyé… lé dir galman pou gingn lir in lète, ranpli in dosyé k’i konsèrn azot. Moin la vi in moun alé dan la boutik pou fé lir par d’moun in désizyon tribinal, té pa an son favèr ditou. Mazine in kou, koman zot i pé fèr-fas in l’administrasyon... étone pa ou si lo zonm i pous son madam dovan li, sansa li domann in z’ami pou alé démay son problèm. Ala k’li lé konm in moun bordé dann l’androi li viv, dann l’androi li lé né, anparmi son bann konpatriyote. Sa lé pa bon non pli pou lo péi, pars sé in bann moun lé a la trènn é i rès azot lo RMI épi bann minima sosyo... arzoute èk sa ké zot lé privé d’aporte z’ot kapasité pou dévlop lo péi. Poitan, zot nana z’ot kapasité, z’ot lintélizans. Poitan, zot i koné fé dé shoz, mé i pran pa kont avèk zot, vi k’i pran azot konm inféryèr. L’èr-la zot i pans zot lé pa kapab, poitan zot lé kapab provi k’i bate l’ilétrism a-tèr. Konm i di dann l’il Maurice : « La pa kapab ? Bizin kapab ! »… I fo ète kapab.

 Justin