D’après sak méssyé Chatel i di, bann jenn rényoné i fo zot i sava fé zot éstaz an France, kan zot sar fine gingn toute zot diplome l’amontrèr. Moin lé a d’mandé pou kossa ?

Somanké ou i mazine la pa moiyin fé in bon éstaz issi La Rényon ? Nout lansègnman lé si telman faye ké sa ? Nou na poin la formasyon NF (norm fransèz) don nou ? Méssyé Chatel, vi koné lo lansègnman La France lé pa si tèlman byin klassé ké sa. Vi koné in takon d’moun i sorte la-dan san savoir ni a, ni b. Mèm bann l’inivèrsité lé pa byin éstra. Alor, arète fé l’onm d’afèr èk nou, pars talèr out shoviy va si tèlman gonflé ké out soulyé i rant ar pi dann out pyé.

Pétète ossi, ou i kalkil in n’ot afèr... konm par ébzanp fé tète nout bann jènn dé lé la mèr patri pou byin ète ratashé sanm èl, pa sèy kass la korde é sové... Si sé sa sé in mové kalkil, pars nou Rényoné, nou Bourboné, nou nana dé patri : inn sé La France byinsir é l’ote sé La Rényon konm méssyé De La Serve té i di. Donkalor, la pankor né sak va tir inn ou byin l’ote dann nout koko d’tète.

Tansyon, si ou i vé tir vanzans kont bann jènn la manifèss pou rèss issi La Rényon, pou pa ète Créteil-Izé ? Travay é viv o-péi, sa ou i vé pa pou nou. Si sé in vanzans, di aou byin la vanzans i donn pa bon konsèy. Mi lèss aou réfléshi déssi sa.

Justin