Matante Zélida la ékrir Justin : Mon shèr nové, mon spès salté, Afors lir aou dann out lékritir an patoi sinpatik, i diré mi koné kossa vi sar kritiké par avans. Moin lé sir, dann la libérasion Ingrid Bétancourt, ou lé dakor avèk so bann rodèr d’bout l’apré di partou la vèrs in ranson... Konm mi koné aou, ou lé mèm kapab dir sé nout Prézidan la donn lo larzan. Moin va dir aou, par avans, ou i tromp. Pou kossa ou i tromp ? Alala la vérité ! Lo ranson lété péyé an dollar. Dollar, sa la pa nout moné ! Lo Prézidan na poin dollar, li ! Sa la pa la moné la Frans ! Donkalor, ou i oi bien sé pa nout Prézidan la pèy lo ranson ! É pran sa pou toué !

Justin la réponn : Mon vié Matante, In bann zournalis tout kalité péi la pou sobatkozé, bate la lang tanpir k’i pé, déssi la késtionn ranson. Inn i di si ! L’ot i di la ! L’ot ankor i di do-si-la-sol ! Inn i di vin million, l’ot i di plis ké sa ! Pou inn, la pa pèy in grin ! Pou l’ot, l’apré tourn in fime... Bann grand-jan lé paré pou roul a tèr afors zot lé pa dakor. Mé kissa va ramène in pé toulmoun a la rézon ? Kisa va di la vérité vré ? Alak k’la vérité i sort dan la boush matante Zélida. Ala k’la vérité i sort dann fon lilète pandiyé !

 Justin