(Page 16)

Pou lèr, si la Shanm Komèrs èk Lindistri i zèr l’aéropor Zilo, l’Éta i done inpé mwayin pou aranz ali. Bann konpani lavion la fine anonsé disi 2010 zot va fé ni La Rénion bann gro portèr nouvo zénérasion : A380. So bann lavion na dé nivo, i transporte dé fwa plis domoun. Pou giny akèy ali, fo fé in pist pli gro, in sal d’akèy pli gran, épi i fo rovwar bann sistinm pou kan domoun i sorte lavion.
Solon in léstimasion la Shanm Komèrs, i fodra o mwin 26 milyon d’éro pou galiz son larivé. Pou finans sa, i fo batay pou lo prosin DOCUP, domann l’èd la kominoté éropéinn, tousala.
Soman l’Éta la fine anonsé son koté li sa rotir ali, li sa mèt l’aéropor dann la min bann gro zozo. Li vé done la zéstion bann privé. Sa i vyin ralonz la list bann sèrvis piblik li la fine kasé.
Domin nou sra pi d’zizazé, mé nou sra d’klian pou l’aéropor. Li vé mèt an plass inn kalité sosiété aéroportièr ousa li va lés la plas bann gro sosiété pou nir bann zaktionèr lo pli for. La Shanm i ginyra pi désid ryin la-dan.
So réform lé pou tout la Frans, mé bann zaéropor dan lé DOM i voudré anbar réform la. Akoz dann nout zil, l’aéropor sé lo sèl mwayin rantré-sortir.
Sa i anminn anou koz ankor in kou kontinuité téritorial. Nout bann zéli, épi nou minm, ni dwa byin porte atansyon so zistwar-là, pangar nout l’aéropor i rotrouv ali dann la min bann miltinasional i anfou dévlopman nout péï.

Justin