I prétan dir, nana in dépité k’i apèl Lefebvre, sé son droi lo pli absoli ! Li lé an parmi bann dépité UMP — bann vré droite ! — dizon, li na lo droi, pars li la port zéléksyon é li la nyabou fé prann zéléktèr, blan pou noir, makaroni pou la bouzi, fromaz pou savon, épi rasine piman pou rafréshissan. Donk i pé ète grav pars i paré rasine piman sé la poizon !
La pa toussa, mé akoz mi koz dé li ?

Pars lo boug nana plin mové lidé dann son tète ! Na dé-troi zour, li la touv in droi nouvo pou bann Fransé : an avoir lo droi travay pou son patron dann in konjé matèrnité, sansa in konjé maladi …san ète dann travay mèm, mé dovan lordinatèr ; in sort "télé-travay".

Konm in kamarad i di amoin, in fos-bone lidé ! Alors gouvèrnman la di li vé pa in n’afèr konmsa, pars in pé i di zéléksyon lé tro pré !
Mazine azot, travay dimans, la fé konmsa mèm, épi la fé pass sa in pé d’tan apré, an dous-é-san sokous.
Si sak mi krin lé vré, dann inn-dé moi, sa va sort sou la tab, va aranz ali in pé, va makiy in pé, apré va fé pass lo z’afèr.

Alors, dann konzé matèrnité, la pa bézoin in madam i songn son kor avan lakoushman épi i okip son baba apré ! Si ou lé an aré-maladi, ou i débrouy out kari pou rofé out santé, épi broute pou out patron !
Ala bann droi nouvo l’arivé. Zis lo droi siprime in droi ansien ! Lé bèl lo sosyal, dann règn Sarkozy... Myé k’sa na poin !

Justin