Matante Zélida la ékrir Justin : Mon shèr nové, mon spès salté, Alor, konmsa, zot la voulu anpèsh madam Le Pen kozé épi ésplik son ka in pé partou konm ninport ékèl kandida i fé ! Zot i konpran pa kèl ont la tonm zour-la dsi La Rényon ? Pars sé in ont pou nou Rényoné an avoir fé in n’afèr konmsa. Pa in ont pou èl vi k’dan sèt afèr, èl i pas pou in viktime, é sak la fé tousa dézord pou in bann voiyou, in bann san konprann, i koné mèm pa bann règ la démokrasi. Aprésa, étone pa zot si in bonpé d’moun an plis i vot pou lo Fron nasyonal ! Arzout èk sa, in mèr rouj-de-fon, olèrk mèt son l’ésharp blé-blan-rouz, i mèt solman in triko rouj, konm si li la pèrd la tras lo blé avèk lo blan. Touléka, lé pa for pou li ! Tok ! Pran sa pou toi !

Justin la fé pou répons : Mon vyé matant k’i koz touzour la boush rouvèr, In kozman konmsa i étone pa moin de ou. Vi koné pa la famiy Le Pen, sansa vi fé sanblan ? Vi rapèl pi tout kalité kozman lo Zan-Mari Le Pen la di ? Vi souvien pi d’son parkour dan l’ékstrèm droit, touzour kont z’émigré, touzour kont bann travayèr, touzour an konplisité avèk bann parti la pran l’éritaz bann nazi. Partou ousa l’avé in mové kou kolonyal pou fé, li lété la. Vi souvien pa kan li la fé zéd’mo an kidtabouèt konm "Durafourkrématoir". A ! Vi vé dir la fy i di pa épi i pans pa la mèm shoz lo papa. Boudikont, ou i vant son l’ipokrisité ? Bin si ou la gard télé, kosa ou la antann aèl dir ? El la di, son bann kontradiktèr té fine boir troi boutèy sharèt épi fime sépa konbien paké lo join. Son kozman an kouyon i grandi pa èl. Arzout ankor in n’afèr sinp : si èl lé an droi di son bann çoneri san sédiy, demoun La Rényon nana lo droi di aèl, èl lé pa bienvéni shé nou. Sé sa la démokrasi ! Tok ! Pran sa pou ou !

 Justin