La-ba, dann Paris, banna i sort fé in komité pou suiv lo “Grenelle l’anvironman”. Sa lé té prévi, donkalor, bon pou sa-mèm. Nana in tralé d’moun la-dan i sava vèy si dann l’outre-mer, i aplik sak la fine désidé. La bien bézoin, dann in périod oussa bann gran-shèf blan i di l’état lé o flan, kaziman son po d’fès lé dann son min. Lé bien nésséssèr kan ou lé dann in péi oussa, d’apré moin, lé pli préssé donn bann gro vaza satisfaksion ké bann ti-kolon.

Soman moin la pèr bann moun dann komité - la i kroi pa vréman sak zot i fé (konm souvan dé foi !). Si wi rogard solman kissa i lé la prézidante, sé Nassimah Dindar. Pou moin, ziska zordi, la pa in shanpion lo dévlopman dirab : moin la pa antandi dir, lo konsèy zénéral La Rénion nana in bon plan pou sa. Mi èmré konète si èl va fé antann son voi kan gouvèrnman i tienbora pa son promès, si èl i kashètra pa sou la tab kan lo pti bononm va tap lo poin par dsi.

Mi romark galman bann moun la fé vréman kékshoz pou lénèrzi dirab, pou protèz la natir, pou dévlop lo péi, zot lé pa dann komité-la, na poin pèrsone la Région Rénion. Alor, noré ankor manzèr manzé kui issi épi la-ba dann la Frans ? Sa la pa in répons, sa solman in késtion.

 Justin