Nana solman dë kandida i sava pass bac la shoizi pas in légzamin kréol rénioné. La pa in bonpé ! Armèt ankor trant i pas in léprèv fakultatif. Pou tout La Rénion, lé mèg !
Nou la fine dir nana in sèl klas matèrnel bi-ling dann La Rénion. Aprésa, zot sar dakor avèk moin pou dir motèr-la nana la sab dann son bann roulman.

Kisa lotèr ? I koné pa bien, mé konm moin la konpri semèn pasé dann premié féklèr lansègnman la lang kréol, i fé plito zékspérians alé oir pétèt i fodré anbrèy la mashine an promièr pou k’i démar in bon kou.
Moin la trouv bann z’amontrèr bien kalifié mé in pti pé tro rézonab. Lé vré, i fo zot i fé tout par zot mèm épi zot ladministrasion la pa tro nèrvé, d’apré sak poin la ‘tandi. I vé pa alé tro vit pou pa kapot dann viraj, dakor ! mé pa boujé-la, sa la pa in bon n’afèr non pli.

Mi éspèr, lané proshèn nou va fé in pé mié Sirtou, kan léspérians i amontr, aprann kréol i fé pa d’tor lo fransé, an kontrèr ! Alor, mèt in pé lo gaz, alé pli for, alé pli vit.

Justin