Le 18 juin, bann sénatër la kass lélan bonpé. oté, bonpé té majine navé inn shanss nout lang i rant dann la konstitision. Bonpé té fine fé le plan, té fine rèv nout lang anlèr, majine ali dann gran lékol, linivèrsité. Akoz pa ankor, nou té antann bann politikèr fé diskour an kréol, an oksitan, an breton. Oté, noré été sitantèlman kalou. Non va ! oki bourik, inn tiork, nièt, rien, zéro kalbass la fimé granboi. Bann lang réjional la poin in rekonésanss nasional. La Nasion nana son lang. La Nasion i koz pa lang réjional. La Nasion i koz fransé. Bann sénatër kont-lang-réjional la désid mèt lïnèt sheval, sat i regard rienk in koté, pa pliss. I regard pa kosa la Frans i vé dir. Nout péi - si bien sïr nou konsidèr li tonm nout péi - i nior tout bann Fransé nana zot lorijinalité. Nou nana nout Lang Moman. Banna va kalkïl, bann lang réjional va tié le Fransé, va anmar nout boush, va anfèrm anou dann nout linsïlarité. tousala, la pa vré. Kan mi koz kréol, i gafourn pa mon lanprantisaj la lang Fransé. Kan mi koz kréol, i tié pa mon lanvi koz fransé. N’inpé i kroi koz bann lang réjional i diviz anou. non ! sé plito kan nout lang réjional i profit pa la rekonésans, kë la divizion i pran nèt. Mé bon lé pir lèr, rant an gran déba. tout bann militan bann vanzèr, lé pa loin ar’sort dann shemin, ar’batay po gingn in pé le respé nou la bezoin po fé viv inn lang. alé di partou...

Bbj