Matante Zélida la ékrir Justin :

 Mon shèr nové, mon spès salté,
Mi domann amoin pou kossa, zot, bann rouj-de-fon, nana kèr maléré konmsa ! Kossa k’i ansèrv azot arpète toultan z’ot bann shif déssi la mizèr, déssi bann moun i koné pa lir, déssi bann jènn na poin travay… ?
So dèrnyé kalité-gori i fatig amoin pou vréman ! Akoz, zot l’apré fé in ka avèk so bann fin-yan la ? So bann san-konprann k’i rode mèm pa travay épi i di la poin ! Pou kossa so bann-la la parti poz la kol, plito k’alé lékol ? Pou kossa zot la plito parti ar-viz sigarète zamal, k’ar-viz lo matématik, lo fransé épi tou lo rès k’i fo konète ?
Na dé foi, mi suifré sa koud’ fouète. Vou ossi, mon spès koko roussi… !

Justin la fé aèl pou répons :

 Mon vyé matante, k’i koz aryink la boush rouvèr,
Alors pou vou, toute bann jènn sé d’moun parèss, sé d’fimèr d’zamal, sé d’zaspèr kuite. Toute ? Sa mi kroi pa vou !
Byinsir, nana in pé d’grinn bébé dann panyé mayi ! Byinsir, nana in pé d’borèr dann karo kann ! Mé si té vréman konm vi di, i rèstré pi k’à assiz, pou pléré déssi la rosh piké.
Mé rozman la pa konmsa ! La prèv ? Vi sort pa oir toute bann jènn la gingn z’ot basho, sansa z’ot BTS, sansa ankor toute sorte kalité diplome ? Matante, koméla, bonpé bann jènn lé pli instruyé k’bann z’anssyin. É la pa toute, an-parmi sak la poin diplome, na poinn kapassité !
Sé bann jènn va fé lo dominn nout péi, son l’avnir ! Akoz, plito, pa mète la zénèss anlèr ?

Justin