Bann-zil la, sa lé gayar, sa lé vanté, sa lé fantézi. Pou moin, mé sa sé konm mi san, la poin aryin k’i vo bann-zil, é moin la romarké si ou i sort in n’il é si ou i sar loin... pa zordi, pa domin, i ar-ral aou out poin d’dépar. Sa sé konm in bato : dovan ou nana la mèr, déyèr ou nana ossi la mèr, koté droite, koté gosh la mèr, la mèr ankor, ankor la mèr. Si ou lé pèrdi, kan ou i oi l’oséan, ou lé sové.
Mé bann-zil lé ménassé, zot lé an danzé, an parti sansa an totalité. Vi ké si la tanpératir klima i goumante dé, sansa troi, sansa kat dégré, lo nivo la mèr va monté. Kèl otèr li va monté ? In pé i di dé mète, in pé i di plis, mèm in pé i anparl sète mète. Si li la goumante sète mète, zot i konpran in pé d’zil va disparète… sa lé sir. Zot la antann parl Maldiv ? Lo gouvèrnman nana si tèlman la krintiv ké li l’apré rode in boute la tèr dann l’Inn sinon dann d’ot péi pou ramass son popilasyon. Li rode galman d’ote solisyon, mé li na poin si tèlman konfyans dann bann tik-tak la. Anou mèm, si la mèr la monte sète mète, nou lé pa sir si noute bor d’mèr i arèss ankor l’androi li lé.
Karante délégasyon bann z’il, sak lé roganizé an l’éta, la parti New-York la-ba pou fé in démarsh l’ONU, pou domann bann péi i polyé lo plis fé in l’éfor pou diminyé lo gaz i fé l’éfé d’sèr, i shof l’atmosfèr. Moin n’a konm dan l’idé banna la pa ékoute azot tro... doi-oir pars zot na poin gran-gran kantité solda, pars zot na poin fizé an konsékans épi bonm an gaspiy pou nyabou o moin fé la provokasyon, épi pars kapitalis bann gran péi i kontante azot, pou l’instan, baz déssi z’ot égoïsité.
Mé lé pa défandi ar-ésèy ankor in kou. Pétète in pé va fini par antann la rézon… é aksèp pran bann désizyon k’i fo, pars konm lo provèrb i di : « Pa kapab lé mor san éséyé ! ».

Justin