Zot i koné, la Frans-la, sa in péi rish pou son lékonomi, pou son rishèss par moun i rès dann péi-la. « An moiyène ! » a s’ki paré !.. Kossa i lé in moiyène ? Lé sinp, ou i mète out tète dann four, out pié dann konzolatèr, la tanpératir out nonbri i tonm zis bon, sé out tanpératir moiyène.

Bin oui ! Lé konm parèy avèk nivo d’vi d’moun. Nivo miyin lé o, solman si ou rogard bien, déssèrtène foi, ou lé plisk’étoné, ou lé mèm trakassé. Mi sort gard dann télé bann moun la Frans i fé komission dann bann gran-magazin : pa kan lé rouvèr, kank lé fèrmé, épi i ral poubèl déor. Nana in bon pé i sote déssi lo poubèl, i kapar manzé la pi si tèlman bon, la pa vréman gaté pou amène z’ot kaz. La-dan nana bann pèr d’famiy, la dan nana bann mèr d’famiy, épi bann sélibat-la-tèr.

Sa in rash kèr in n’afèr konmsa, épi lo gouvèrnman l’apré radoté toultan... apré di i sar fé rokil la mizèr, i sava goumante lo pouvoir d’asha.

Pou kissa ? Pa pou sak lé o-flan konm JOB, mé pou sak nana lo pourkoi. Akoz, konm di mon kamarad Simon, in pé i « manz konm koshon, i siii konm kanar, épi i piss konm torti ». Lé z’ot i rogard ! N’ar trouvé !

Justin