Dann milié, nana lo rakontèr zistoir, épi tout autour, an ron, asiz kat pat, bann marmay ! Zot i atann rakontèr zistoir i déside komansé. Épi, lo rakontèr i rak in tour la gorz épi li komans : li rakont zistoir Ti-Zan èk son panié mazik. In moush i vol pi... Marmay i ékout mèm !

Momandoné, rakontèr i di : « Kriké ! Kraké ! La klé dann mon posh, la tay dann out sak ! ». Marmay i mèt a rir parèy grin kaskavèl dann kayanm.
Ala l’hèr l’arivé pou fé monte pti panié. Lo rakontèr i di bann marmay : « Alon shanté pou fé monte ti panié-la dann sièl ».
Marmay i shant : « Ti panié, monté ! Ti panié, monté ! Ti panié !... » Ti panié i monte, i monte, i désote la otèr pié d’boi. So kou-si, i shante pou fé ardésann lo pti panié : « Ti panié désann ! Ti panié désann ! Ti panié !... »

La voi bann marmay i kouvèr la voi lo rakontèr : na pi inn, mé dis, mé vin, mé trant voi ansanm.
Tèlman mayé, tèlman soudé. Zénérasion gramoune èk zénérasion marmay. Sèt yèr èk sèt zordi, lo passé èk lo prézan, inn i bite avèk l’ote pou done in tan nouvo : lo tan demin, lo fitir, l’avnir.

Justin