Zot i rapèl ? I fé apéprè si moi d’sa, nout dalon Bbj lavé anparlé lo liv Robert Gauvin l’UDIR la fé, La Rényon dann kër, in tralé ti zistoir gramoun-la néna dann kër, kan li mazine son péi. Dizon so pti péi li néna dann kër, sé La Rényon bann zané 50 armonté, ziska zané 80 dann désertin zistoir, ziska bann zané 2000 dann dot. « Tir in kou la parès, lir in pé an kréol » liv-la lété po di anou. Zot la lir ?
Astèr, i pé ékouté. I pé osi lir anmèm tan i ékout : lo diks lé fini fé. Dominik Carrère ansanm Danielle Moussa la antouré Robert Gauvin po rakont so pti zistoir-la : lo mèm zistoir té fini ékri, sèlman i fonnkër pa komm sa tout lo total-kapital ! Zot la soizi 19 tèks anparmi lo trantèn lété ramassé dopi lo tan bann “kronik” Robert Gauvin la fé pou RFO.
Dominik Carrère la fé téat èk bann Vollard, shanté èk bann Tropicadéro, ékri inn-dé tèks pou zot, i travay pou Komité la Kiltir (CCEE)... i prézant pi ! Zot dé voi, ali ansanm Danielle Moussa, i may bien ansanm, èk sat Robert Gauvin. Rant bann tèks, la mèt inn-dé ti mizik La Rényon lontan : bann Pat’Jaune, inn-dé ti romans Ziskakan, in mizik Patrick Sida i zoué pou in bout.
Lé bon mèm pou ti marmay lékol, si zot i vé aprann « koz komkifo kréol zot gromaman »  : daborinn, i ékout - zot va rokonèt lo kozé - aprésa i koz dessi ; si zot i vé, si zot i gingne, i tash manièr ékri. Lo bann larmontrèr-lékol lé la pou di azot koman i fé.
Ala li-la, lo zafèr lé paré. Lo CD, sé Tikouti la fé.