I pé pa dir nout prézidan, dopi in sèrtin tan - mèm avan k’li lété prézidan - la pa grat d’sou l’pyé bann patron, la pa fé azot kado, pti konm gro. I pé pa dir li la pa fé bon rolasssion avèk zot. Inn-dé la mèm pèy vakans pou li, mé ni arparl ar pa la dsi. Pou lo moman.

Donkalor, apré an avoir fé sak li la fé, épou nou, vi sak nou la vi, nou noré pi maziné bann patron téi sava donn lo grin, plas larzan, ashté mashine, anbosh bann moun intélizan é an kapasité pou goumante épi pou myé produir, adapt azot lo gou demoun. Alé oir zot ! Minis dé Finans la pansé lékonomi nora in "taux de croissance" dé poinvinn-sis : lé faye in ! Sof ké in bann lékspèr l’OCCE la di : "Arvoir Pièr, tak baro !", a pèn si lo to an késtion va goumant in poin katr-é-vin. Ay-yay-yay ! La lé ak la ! Moin mi romark son flaté la pa ansèrv arien...

Sa i rapèl amoin in zistoir : In boug lavé anvi kas lanbordir avèk in zènn fiy. Li mète dakor avèk lo momon pou roganiz in manzé fantézi. Batay kouvèr dann zasyèt ! In momandoné, la momon i lèv pou artir in tro-plin, lo zoli kèr i rod fé in zès. La fiy i réponn ali : "Mésyé, out manzé té bien bon, mé pou le rès, demann maman !"

Justin