« É pourkoi pa lunyon avèk zanimo ? Ou la poligami ? ». Brigitte Barèges, dépité UMP, la pronons sé mo mèrkrédi sèt somèn kan la Comisyon d’loi Lasanblé nasyonal té apré èkzaminé in proposisyon d’loi lo group politik SRC (1) pou rouv lo mariaj o koup omosèksuèl.

Propo kom sa lé kalifyé domofob, dindign, mèm si i sort la bouch in dépité kèl kèl soi lo bor. Isi nou di : « la bouch lé sal ». SOS Omofobi kom SOS Rasism la kondane san pli zatand sak madam la la di.

Dayèr pandan la Journé internasyonal lut kont lomofobi é transfobi — 11 mé —, SOS Omofobi la prézant in rapor anyèl si lomofobi. La sityasyon i agrav, lomofobi é transfobi i èsprim si inèrnèt, na la diskrimionasyon é la vyolans dan lyé piblik, travay, voizinaj, famiy é lantouraj proch. La diférans i déranj.

Poitann, an Érop — é dan dot Zéta —, na 7 péï an parmi 5 Lunyon éropéèn i rokoné mariaj omosèksuél : Péï-Ba (2001), Bèljik (2003), Èspagn (2005), Syèd (2009 avèk in disposityon i ioblig Légliz trouv in pastèr pou sélèb maryaj rélijyé), Norvèj (2009), Portigal (2010), Lisland (2010). Dan sé péï, koup gé é lèsbyin kan i mari na lé mèm droi koup étérosèksuèl.

Sak madam la dépité la di, i fé rapèl la réaksyon in not madan, Christine Boutin. A lépok kan té koz Pak sivil solidarité — an fransé Pacte civil de solidarité —, èl la brandi in Bib a Lasamblé nasyonal. Dot la manifèsté avèk in pankart ékri d’si : “Lé PD o Biché” ! La pa ampèch aplik lo Pak sivil solidarité mé pa aryink pou pèrson mèm sèks.

Nou tèrmine par in kèstyon : pou koué domoun omosèksuèl noré pa lo droi maryé ?

1 – Sosyalis, radical é sitoyin.

Justin