Matante zélida la ékrir Justin :
Mon Shèr nové,
Alors koméla kann nana momon avèk papa. Anplis ké sa, i fo kinzan pou gingn in variété kann... Mon papa téi di amoin in bourik i port son pti plis dis moi, mé kinzan, la la bate lo rokor ! Ou i kroi pa bann politik l’apré tourn anou kari sou d’ri, sirtou bann rouj-de-fon akoz moin lé sir sé zot l’apré fé la bétiz konmsa ! Alé mon spès salté d’nové. Touléka, zot i koné fé d’tor ! Dan l’tan mon défin papa téi plant kann 337, sa té vayan, sa téi pous partou. Akoz la fé déplant sa ?

Justin la réponn aèl :
Mon vié matante, kossa ou l’apré shanté ankor ? Kossa i fé jaz aou konm in liv rouvèr ? Matante, invant in variété kann, sa in n’afèr lé inportan akoz i fo dann le nouvo variété, i tir plis dé sik, i gingn in bon poids, i dépans moins delo, moins langré, moins la poud pou tié borèr. I fo pa li tonm malad pou in oui, in non.
Matante, ou i koné, pou in variété i gard, konbien i fo jété akoz zot lé pa bon konm k’i fo. Pou sa mèm i mète kinzan. Noré pi arivé o bout kinzan, i fo jète tout épi arkomans rodé. Zordi la trouv inn, i apèl R 583 : prièr bondié sa in bon variété, in bon kalité kann, pou garantir lavnir nout plantasion ! Akoz, kann sa in n’afèr lé bon pou nou.

Justin