(page 16)

Dopi inn mon bann magazine télé la sanz formil, mi dékolèr pa. Déza mwin lavé pèr sak sominn rouv son bann paz pou tonm dann in siklone la violans. Mi koné pa si lé fé pou fèr vann plis. Mi pans pa sé in bon lidé. Antouka mwin i done pa mwin lanvi d’lir, ankor mwin d’ashté. Mé mwin lé oblizé pran ali kan mi ashèt mon bann trwa zourno ièr matin.
I fo war de visu kosa magazine-la la oz sorti pou la zourné d’la fanm. Na inn ou dé fanm si 10 La Rénion i giny lo kou sanm zot bononm èk bonpé i mor an shyin tandi zot i arèt pa soubat pou giny zot plas dan la sosiété, na pwinn mo pou sa. Magazine-la i di aou lo fanm bati i réponn par la violans. Pou aport la prév, zot i rogard sak la rant an prizon épi i done aou bann détay, pou ravaz la boush. Lartik té san télman mové, mwin la pa lir ali zisko bout tèlman té pou larg la tay dan mon tèt. Somanké li rod lo promié plas lo pri "infame." Pangar si Zistine i krwaz aou dann somin, ou lé riskap giny in volé bwa vèr.

Justin