Antansion lobézité : bon pé marmay èk bon pé gramoun na tro lo poi, tro la viann, tro la grès. La maladi i sava monte déssi nou konm karapat sï tété bèf... Sa i tonm bien, nana in piblisité pou lo big mak dann télé. In kou, i di pran prékosion, in kou, i di manzé don, lo frèr !

Nana inn dé landroi déssi la tèr demoun lé gra konm réyon bisiklète, ou i dire z’ot éskélète la oubli son viann épi la amène arienk lo zo avèk la po... Sa i tonm bien vik bann landroi-la, souvan dé foi, néna la guèr épi bann zournalis i vien pa bou alé. Soman, lé z’arm i mank pa.

Avèk sèt kilo lo blé, i gingn fé in kilo dé lé. Avèk lo blé, mayi, tousala, i gingn fé lésans pou mète dan bann loto. Sa i tonm bien vik pétrol i komans ète rar, épi lé sho pou nout porte-moné.

Dann trant’an, nora troi miliar demoun an plis déssi la tèr. Alor, koman va fèr ? In nouvo révolision dann lagrikiltir ? Pétète, pétète pa ! Sa i doi pa anpèsh anou manz nout zasiète dokèr ! Nou lé pou arien la-dan ! Mèm nout kèr i singn kan ni oi demoun apré mor la faim. Sa i tonm bien !

Justin