Na dé foi, ou i antan in nouvèl i fatig aou pou la zourné, i mète out kor é out moral an golinm. Na dé foi, ou i antan in nouvèl, i rann aou bone imèr, konm si ou i oi la vi an koulèr. Lèr-la, pou la zourné, ou lé kontan. La pa toultan, sa i ariv, mé kant mèm i ariv souvan-défoi, é sé in bon z’afèr.

Donkalor, mi sort antann in n’afèr la kontant amoin, pou vréman : Françoise Vergès, banna la nonm aèl konm prézidante Komité pou la Mémoir Lésklavaz épi la Trète bann Noir, si mi tronp pa. Lé vré, la pa in nouvèl frèsh, vi k’nana déza in bon koup de tan la nonm aèl, mé lé pa nitil rapèl in n’afèr konmsa vi k’i sort pass dann télé, dann in sérémoni ofisyèl.
Pars sa in bon nouvèl pou in pèrsonn bann san-konprann l’apré toultan krétiké, pou in oui, pou in non ; konm di lo kont, pou la po patate !

Sa in bon nouvèl, galman, pou tout sak i èm kan i mète anlèr in zanfan La Rényon, donk i mète anlèr nout péi. Sirtou, pou in bon n’afèr konmsa, pou kékshoz lé just.
Sak la touzour vanz pou nout listoir, tout nout listoir, san mète in pé dann féklèr épi lèss in pé dann fénoir, lé forsé, zot ossi, zot lé kontan pars zot i rogard an aryèr, épi zot i oi shomin la fine fé.

Byinsir, nou lé pankor o-bi, shomin lé ankor long pou in vré rokonésans lo passé. Mé konm di la shanson : « Shomin Granboi, sa lé long, ti-pa, ti-pa n’arivé ! »

Justin