Justin la aprann dann zournal, Prézidan Sarkozy i pass vakans gratuit : sa in gayar z’afèr sa ! Zistoman, demoun i di ali in sèrtin Ti-Roné Boirloplate i rod in moun pou partaz vakans avèk li. Pou kass son solitide ! Amène pa arien lé bon ! Justin sé d’sonn lo boug. Lé dé i donn randé-vou dovan éskor pou pran soidizan dé-troi pti kouyonad i mank lo boug son kaz !

Mé toudinkou, lo « dé-troi kouyonad » la vni in takonn komission. Lèrk la pass la kèss, Zan Roné la di Justin, pèye èk son kart, li va ardone la monaye kan v’ariv son kaz. Justin la fé, mé soman li té trakassé ! Sa la pa in gob, sa ?
Lèrk lo kar i ariv, lo dénomé Ti-Roné sé d’sote anndan avèk lo bann komission. Shofèr lo kar, mèm konplis avèk li, i démar toutsuit : Justin i rès atèr. Lo bézèr d’paké, i larg dan la figuir Justin an partan : « La pa bon abiz déssi demoun ! »

Oté, lé ga ! Lo rèv vakans san dépansé, la fané. Ala Justin, roulé dan la farine, blizé réfléshi dsi lo patoi : « Souvan dé foi, bon marshé i kout shèr ! »... Si moin lété Prézidan Sarkozy, moin noré méfié so vakans gratuit-la ! Sa lé riskab i vien shèr in zour...

Justin