Konsèy dé minis la COI i sort réini, mardi passé, dann Konsèy réjyonal. Alain Joyandet, in sou-minis gouvèrnman fransé la prézide la séans travay. Alain Joyandet ? Pétète son nom i di pa zot aryin... mé sé li k’la parti Maurice pou sign in zakor, pa pou lo ko-dévlopman, mé pou donn nout voizine kékshoz konm in lidèrship par raporte anou. La poin lontan sa la éspassé, vi k lété dann la kanpagn pou zéléksyon réjyonal. D’apré sak moin la antandi dir, l’avé poin pèrsone, mardi passé, pou défann vréman zintéré bann prodiktèr La Rényon. Pou kossa ? Pars Madagascar, Comores, Maurice, Sésèl… sa lété pa zot problèm pou vréman. Tan k’a lo minis fransé, li té pli okipé par la késtyonn zéléksyon Madagascar, épi dann bann zil Comores, par bann pirate dann l’oséan Indyin k’a défann zintéré bann rényoné... Pour sir in bann késtyon inportan… mé la défans nout lékonomi ossi lé inportan... touléka pou nou. Arzoute èk sa, in prézidan Konsèy réjyonal, plis okipé a kassé, k’a dévlopé, ni pé dir nou lé mal parti. Dann in lantouraz konm sa, pour sir, nout kanar sar noir. Si ni rogarde in pé déyèr nou, par dsi nout zépol, ni oi in Konsèy réjyonal, sète Pierre Lagourgue, Camille Sudre, Paul Vergès byin okipé pou défann La Rényon é son dévlopman dirab. Mé sanm pou moin, la pi ditou konmsa zordi. Zordi, nou lé dann danzé.

 Justin